سلامیہ
کرے نہ کیوں زمانہ احترام ‘ یا حُسَین !
بَلنـــد تر ہــے آپ کا مقام ‘ یا حُسَین !
کب اَصغر و سکینہ کے لبوں تکــ آ سکا
فرات رہ گیا ہے تَشنہ کام ‘ یا حُسَین !
اُنھی دِنوں میں عام قتل و خُوں کِیا گیا
کہ جن دِنوں میں جنگ ہے حرام ‘ یا حُسَین !
یہ آپ کے کلامِ خُوش اثر کا ہے کمال
کہ حُر بھی آپ کا ہُوا غُلام ‘ یا حُسَین !
تمام تَشنگاں نے جام نوش کر لیے
کہ جام بھی شہادتوں کے جام ‘ یا حُسَین !
ہر ایک شب کٹی تلاوت و سجُود میں
رہے ہیں آپ رب سے ہم کلام ‘ یا حُسَین !
جگہ جگہ بپا ہیں کربلائیں آج بھی
وہ کاشمِیر ہو کہ ویت نام ‘ یا حُسَین !
ہر ایک خیمے سے دُھواؑں سا اُٹھنے لگ پڑا
کہ ہو گئی ہے کربلا میں شام ‘ یا حُسَین !
ہر اک اِمامِ وقت کو ہے اِس کا اعتراف
نہیں ہے آپ سا کوئی اِمام ‘ یا حُسَین !
یزید جیتے جی ہی اِس جہاں سے مِٹ گیا
دیا خُدا نے آپ کو دوام ‘ یا حُسَین !
کُھلا کہ یہ رباطِ دَہر جاے خُوش نہیں
یہاں پہ چند رُوزہ ہے قیام ‘ یا حُسَین !
کہِیں پہ ذکر آپ کا چِھڑا ہے جب کبھی
تَو مُجرئی یہ کہہ اُٹھے ” سلام یا حُسَین ! "